YAŞASIN AZƏRBAYCAN

بذ قالاسيندا

چهارشنبه 9 شهریور 1390
بذ قالاسيندا

محمد تقي زهتابي
بذ قالاسي- ١٣٥٩ نجي ايلين خرداد آيي
وب اوچون حاضيرلايان:
گجيل
http://www.Gajil.20m.com
ص ٢ http://Gajil.20m.com : بذ قالاسيندا – محمد تقي زهتابي--------------------- گجيل
قوجا داغلارين اوجا زيروه سينده باخير ووقاريله بير قالا
ائله بيل كي، يئر اوره گين ياريب چيخارير نهنگ اوجا بير قايا
قايانين باشيندا طبق كيمي قالاني قويوب آپارير آيا
دئيه سن به يا كي، خطر گوروب آليشان آنا
گويه قالديرير بالاسين، قويوب ايكي اووجونا
سورونوب قالانين توپوغون اوپور كوله گيله رقص ائله ين دومان
بولودون امير مه مه سين شيرينجه ياتير قالا
سينه سين ده گاه ياراراق اونون اوجاليب، بو دور
گونشين قيزيل ايشيغين اودور
گئجه اولدوزون قوجا سيرداشي
آي اونون هميشه كي، يولداشي
او گورر بيرينجي آلاولار اولكه سينه سحر سوكولنده دان
ساوالان ساغيندا فلكلره اوزادير باشين
باخيب آختارير قوجامان سهنديني، اولمه ين قوشا قارداشين!
اوجا داغلارين قوجا زيروه سينده باخير ووقاريله بير قالا
مئشه لر اوپور آياغين اونون
كولك اوخشايير ياناغين اونون
سايا بيلمز سن بولاغين اونون
اولا بيلمه ميش هله داشلاري يووا قارتالا!
دوشه رك و سويكه نرك قيلينج كيمي ساللارا
دورورام، گئديب كئچيرم داغين، چاتيرام يالا
نئچه زيروه لر، نئچه سيلديريم، نئچه اورمانين
قاياسين، دوزون، كئچيدين، بويوك مزاريستانين
كئچه رك ياواش گئديرم، گئدينجه هر بير آن اوجالير قالا
دونه رك باخاندا بير آنليغا كئچيلن يولا
قارالير گوزوم...
ص ٣ http://Gajil.20m.com : بذ قالاسيندا – محمد تقي زهتابي--------------------- گجيل
دايانيب اونومده بو دور قالا
اوتوروب او داغ يئكه ليكده شيش قايادان سالا
ستمين اسيرگه مه ميش اونا قوجا روزگار
بوراخيب، اوتوب كئچن عصرلر اونو يادگار
بو آلاولار اولكه سينين دوشوندن امنلره
داغيليب سادا، اله نير گئنه ظلمت، ووقار
باخيري، سوسور سادا، داغلارا و چمنلره
ائله بيل باخير زامانين گوزو...
باش اييب ووقارينا توپراغين اوپه رك اونون
دئديم: اي قالا!
دئه نه دير آدين؟
ازلينده كيم اولوب اوستادين؟
نئچه موحتشم ساريليب باشان دومان، اي قالا!
سني قوينونا بو ديار آليب آنا مثلي مهربان، اي قالا!
سوكولوب ديوارين، توكولوب داشين
اوره گين يقين دولودور، بوجور چاتيليب قاشين!
كئچيب عصرلر، دئه نه لر چكيبدي سنين باشين؟
كيم اولوب ازلده كي يولداشين
و سيلاحداشين؟
سوكولوب ديوارين، توكولوب داشين...
گئنه ياز گلنده هميشه لاله دي سير داشين
گورونور ووروب سنه ضربه لر
كئچن عصرلر و قرينه لر...
گئنه توكجه سارسيماييب ولي ووقارين سنين
و چكيبدي قامچيلارين زامان كوره گن قالا
و چكيبدي داغ اوره گن قالا
و ووروبدو زنجيري ايگيت بيله گن قالا
كي، بوغوب سسين، قويا سون بويوك ديله گن قالا...
گئنه لاله لر
ياز اولونجا قالديراراق سينه نده پياله لر
دئييري كي، قاينايان آل قانين هله دونماميش
ص ٤ http://Gajil.20m.com : بذ قالاسيندا – محمد تقي زهتابي--------------------- گجيل
ووقارين گئنه، كئچيري مين ايكي يوز ايل، بو گونده تالانماميش
هله سونمه ميش آلاوين، اگر چه اوزون زاماندي كي، يانماميش
قاپانيبدي ياد قانيله، زامان توز ا يله گوزون
دوداغيندا دوندورولوبدو خنجرين سوزون...
گئنه لاله لر
ياز اولونجا قالديراراق دوشونده پياله لر
دئييري: اينانماميسان، قالا، اولن اوزون
و عصيرلرين كولو اورتسه ده
يانيري ايچينده پيريل- پيريل غضبين، كوزون...
ديله گل، دي آچ اوره گين قالا!
دئه نه دير سنين ديله گين قالا
دئه نه لر چكيبدي باشين، داشين؟
سني كيم اولوب بو گونه قويان؟
قوجا دوشمنين، يا كي يولداشين؟
باشيوي اوپوب اوتوشن بولود
نفسين دئييل؟
ديريسن، دئمك اولو سان قالا
اوزو غملي سينه سي قان قالا!
دئه نه دير آدين؟
كيم اولوب، دانيش، قوجا فرهادين؟
تانيميرسان بو علي الدوام
قوجاغان قوناق گلن اوولادين؟
گتيريب بولار ووقاران سلام
كي، اوپوب شرفلي بو توپراغين
ائل اوچون ايگيتليگه آند ايچه
حياتيندان، ائل دئسه، واز كئچه
دئه نه دير آدين؟
نييه دينميسن؟
نييه سوسموسان؟
ص ٥ http://Gajil.20m.com : بذ قالاسيندا – محمد تقي زهتابي--------------------- گجيل
قالا دينمه يير
نه جواب، نه سوز، نه ده بير كلام
نه ده سس- سمير!
قالانين گزير سينه سين نسيم
گزيشير نسيم ايله آغ بولود
جواب آلمايينجا يانير ايچيم...
قالانين ديبينده اوتورموشام
دولانير باشيمدا فيكير مدام
اوره گيمده دغدغه، مين خيال
نئچه مين سوال!
گونش اودلو توپ تك اوفوقده ساللاناراق باتير
و قيزيل دونويلا گلين كيمي بزه نير قالا
گئجه شرقدن چاپاراق آتين قانادين سه رير
و ياواش- ياواش يوماراق گوزون دره، داغ ياتير
و طبيعت ايله ده من اوزوم!
دئيه بيلمه رم نه زامان منيم يومولور گوزوم...
گوزومو يوخو آپاران كيمي
گوزومه گوروندو هامان قالا
كي، قيميلدانير قوجا شيرلر يوخودان سحر اويانان كيمي
اوجاليردي هئي بو سوسان قالا
اوجالينجادا، آغاريردي صبح چاغي دان كيمي
قالانين بو هئيكلي عاقبت
دونوب اولدو بير اولو قهرمان
آتي كيشنه ييب شاها قالخيري
قيلينجي الينده پاريلدايان
او وورونجا هاي دره، يال و داغ
دونوب اولدو اوردو، ايگيت، قوچاق
گله رك تلاطمه اوردولار
ص ٦ http://Gajil.20m.com : بذ قالاسيندا – محمد تقي زهتابي--------------------- گجيل
بيري توركيجه
بيري توركمن، بيري كورديجه
باغيريرديلار:
اولو بابكه
ابدي شرف، بويوك افتخار!
ياييليردي شيمشه گه بنزه ين سسي بابكين
داغا، دوزلره
و ايشيق ساچيردي يانان ببكلره، گوزلره
و اومود وئريردي اوركلره
گوج اولوردو قوللارا، ديزلره
ياييليردي شيمشه گه بنزه ين سسي بابكين:
بو يئرلر بيزيم دير ازلدن، بيزيم
نييه دوغما يوردومدا من قول گزيم؟
نييه ياد اليلن سويولسون ائليم؟
نييه سوسدورولسون شكر تك ديليم؟
بو يئرلر بيزيم دير ازلدن، بيزيم
گرك اوز دياريمدا آزاد گزيم
قودوز شاهلارا بيز ازلدن ياديق
خليفه آدين قويسادا، شاهدير او
سيزين تك بشر، يوخسا آللاهدير او؟!
عرب قارداشين دا گوزل يوردو وار
او يوردوندا اوز عشقي وار، دردي وار
قوي آزاد گزه دوغما يوردوندا او
بو آزادليغا بيز اوركدن شاديق.
گوواراسي اولسون او شيرين حيات
و لاكين بو يئرده بيزيم دير بيزيم
گرك منده يوردومدا آزاد گزيم!
عرب قارداش اولسا، اونا قارداشيق
ص ٧ http://Gajil.20m.com : بذ قالاسيندا – محمد تقي زهتابي--------------------- گجيل
آغير گونلرينده اونا سيرداشيق
قيلينج ايله گلسه و لاكين، اولار
بو يورد اونلارا هر بير آدديم مزار!
قيام ائيله ينده بيز آند ايچميشيك
آزادليق اوچون هر نه دن كئچميشيك
بو يئرلرده بيز
يا آزاد گرك ايشله ييب دينجه لك
و يا خود شرفله ايگيت تك اولك
سويولسون نييه كندلينين هر زادي
چيچكلنسين آمما اونون باغدادي؟!
بو ائللر آزادليق سودوندن امير
ايگيت تك اولر، لاكين اولماز اسير
ائشيتسين، دوشونسون بونو معتصم:
بويورسون دويوش قصدي وار مئيدانا
آزادليق گركدير بوتون ايرانا
گرك حر اولا فارسي دا، توركوده، كوردوده
بو ائللر حقيقت بيلير قرآني
اونا سارسيماز ذره جه ايماني
گئدير عرشه ائللرين آلقيشي
گزير آت بئلينده قادين، كيشي
بو ائلين گوزونده يوخ آسلانين
ديشي، اركگي!
امه گي جوشور آزاد انسانين
قيلينج الده هم آپارير خيشي
چالاغان كيمين
او حاضيرلاشير گله جك سمالارينا اوچوب هاوالانماغا
ايش اولوب شرف و امك بولاق كيمي قاينايير
قوتاراندا ايش قيزي، اوغلاني چاليب اوينايير...
گاه آخير دومان كيمي اوردولار
ص ٨ http://Gajil.20m.com : بذ قالاسيندا – محمد تقي زهتابي--------------------- گجيل
ازيليب، دونور لپه لر كيمين
آزاد انسانين گوجو سئل كيمين داغيدار، ييخار
داغيدار قارانليغي، گون چيخار...
بو ظفر سورور دوز ايگيرمي ايل
دويوشور، اكير آزاد اولموش ائل...
آزاد اولسا ائل اميرين حياتي اولار قارا
چكيليب ايچينده خليفه ليك ائله بيل دارا...
دوشونور مدام قوجا معتصم
او كي ائتدي شيعه يه مين ستم
اوره گينده كينه، اوزونده غم
سحر- آخشام ايشلري مصلحت
نه قالير نديم، نه ده باش بيلن...
تاپير عاقبت
قوجا حيله گر ظفرين يولون:
كوره دن دميري چيخادار دمير
بوكه جكدي يولداشي بابكين او پولاد قولون
ازه گر او توركو بو توركلر
آغاليق قالار بيزه بي خطر!
كوره دن دميري چيخادار دمير
گئدير افشينه قوجا ائلچيلر، بويوك ارمغان
گئدير اوزبكيستانا هر سحر دولو كاروان...
گليب آخيريندا اوپور او، معتصمين الين.
عرب اوردوسو، عجم اوردوسو
نه كي واردي شرقده، غربده
سودانيندادا، يمنينده ده
ميصيرينده ده، عدنينده ده...
ص ٩ http://Gajil.20m.com : بذ قالاسيندا – محمد تقي زهتابي--------------------- گجيل
آخيشير گلير، قارالير سهند
ساوالان سوسور، آلينير ميشوو
بوغولور قانيندا دا مازيار
كسيلير آراس، سوكولور مرند...
بورويور دومان كيمي اوردولار...
قورويور قانيله تامام بير ايل
قوجا ايرانين شرفين، آدين
و آزادليغين قوجامان بو ائل
و اوجالديردي گويه فريادين
سووارير قانيله داغين، داشين
ياد اونونده ديك توتور اوز باشين
آنالار وئرير ايگيت اوغلونو
گلين ايسه سئوگيلي يولداشين
نه گركدي بونلار آزادليق اولماسا ملته؟
آزاد اولمايان ايه جك يقين باش اسارته
اسير عومر سورسه اگر جوان
او، جوان دئييل، سورونن كوله!
شيرين عشقدن نه قانار بشر
آزاد اولماسا اوز ائوينده گر؟!
قوجا سومباتين، قوجا تولكونون
بير ائلين دوزون بير عومور دادان
اوزو دوست ايكن، ايچي بير ايلان
بئله دوشمنين آجي خنجري ده يير آرخادان
قورولور كمند
توتولور قوچاق
توتولور بوتون ياري، يولداشي
قيريلينجا ساقه، سينار بوداق
وورولور آزاد دوغولان بيلكلره عاقبت كلك ايله بند.
ص ١٠ http://Gajil.20m.com : بذ قالاسيندا – محمد تقي زهتابي--------------------- گجيل
اوتوروبدو تخته باخير گولر قوجا معتصم
تاجي اينجيلي، ائوي محتشم
سوزولور شراب
دانيشير كامانچا، گولور روباب
سوزورو اسير گلن اينجه قيز و گلينلر هئي
دولانان پياله لر هر آن بوشالينجا مئي...
وئرير امر جلادا بابكين قوپارير قولون
آييرير سولون
ساغ الينن او اوزونه چكير بير اووج قانين
بو نه دير؟- دئيه، سوروشور خليفه ي مسلمين!
ائشيدير جواب:
من ائليم كيمي قانيله، جانيله سنه دوشمنم
ساري رنگينن
قاباغيندا من
آياغيمدا كونده اگر اولم
يازاجاقدي تاريخينيز كي ، قورخودان اولموشم
سيليرم بو لكه ني اوز قانيملا من ايندي دن!
يوخودا بو حالته آغلاديم
بير ائلين اوميدي باتان گونه
ساوالانين ياد اليله بختي ياتان گونه
نييه باتدي گون، نييه اولدو بابك ائل اوغلوموز...؟
نييه لرله گويلره دوغرو گوز آپاراندا من
گورورم دورور گوزومون اونونده هامان قالا
گئنه بابكين اولو هئيكلي
اوزانيب الي
اوجادان دئيير:
اونه باخ، اونه
گويه يوخ، منه!
اولومون گوجو ائل اوچون اولنلره چاتماميش
ياتيب ائل، ولي قالا ياتماميش
ص ١١ http://Gajil.20m.com : بذ قالاسيندا – محمد تقي زهتابي--------------------- گجيل
چاغيرين ائلي، بوغا ظلمتي
قيرا زنجيري، آتا ذلتي
چاغيرين ائلي، آييدين، دورون
كي آلاولار اولكه سي شن گرك
آزاد ائللره اولا تن گرك
آييلين، بوغون بو قارانليغي
گونو ميخلايين گويون آلنينا
سيزه قول كيمين ياراماز حيات
گوزون آچ اوزون، ياتاني اويات
آييلين، دورون
دويوشوب آزاد بير حيات قورون...
ائله نعره چكدي بو سوزلري باغيران زامان
كي، اوياندي يئر، ساوالان دا اسدي، سهند ده
ميشوون باشين بورودو دومان
تر ايچينده منده هراسينان
آييلان زامان
يوخودان دوروب قالانين بوتون دره سي، داغي
گونشين قيزيل كيمي بايراغي
بزه يير فقط قالانين باشين!
باش اييب اونون اوپورم بو گون ده پولاد كيمين دايانان داشين!
سون


بؤلوم : azerbaycan
یازار : QARTAL